РУШДИ СОҲА ЭЪТИМОДБАХШ АСТ

Душанбе, 24 ноябр. (АМИТ «Ховар», ). — Дар  10 моҳи охир корхонаҳои паррандапарварии шаклҳои  моликияташон  гуногун зиёда аз 110  млн. дона тухм ва  2331 сентнер (тонна) гӯшти  парҳезии  мурғ истеҳсол  карданд. Истеҳсоли  тухм назар  ба  соли 2006 – ум қариб  5  баробар  афзуд. Барқароркунии  пурраи корхонаҳои  соҳа  аз соли 2007 – ум  ибтидо  мегирад. Агар  чор  сол  пеш  аз 24  корхона  6 – тои  он кор мекард,  пас  ҳоло  30  корхона  фаъолият дорад,  ки  6 — тои  он  корхонаҳои  хусусӣ  мебошанд. Ҳоло дар корхона ба парвариши бедона, ки тухму  гӯшти он хӯрокии парҳезӣ ва  барои  одам  судманд  аст,  шурӯъ  шудааст.  Ин маълумот дар  Машварати ҷумҳуриявии  «Роҳҳои рушди   соҳаи  паррандапарварии Тоҷикистон» баён гардид.  Директори  генералии  КВД «Саноати  паррандапарварии Тоҷикистон Машокир Назаров  дар  бораи  роҳҳои рушди  соҳа  сухан  гуфт. Мавсуф зикр намуд, ки  амалигардонии  барномаи  ҳукуматии  рушди паррандапарварӣ  барои солҳои  2007 – 2015 дар  ҷумҳурӣ, ҷудо кардани 5100 гектар  замин  ба  корхонаҳои  соҳа  барои  истеҳсоли  хӯроки  парранда  ва  гузаронидани  корҳои  пурвусъати  ташкилӣ ба барқарорӣ ва  пешрафти соҳа мусоидат  намуд. Қабул  шудани  қонуни  Ҷумҳурии  Тоҷикистон «Дар  бораи  паррандапарварӣ» соли  ҷорӣ  ба  фаъолияти паррандапарварон таккон мебахшад.  Намояндагони ҶММ «Техно» (Украина), «Свердловский» ва «Авивак» (Россия) ва корхонаи мурғпарварии  «Самарқанд» (Ӯзбекистон) ҳамкасбони  худро  ба  ҳамкории  техникию  технологӣ даъват  намуда, гуфтанд  тайёранд кӯмаку  ёрии  амалӣ  расонанд.   Дар  машварат вазири   кишоварзии  Ҷумҳурии  Тоҷикистон Қосим  Қосимов  иштирок ва  баромад  намуд.  Дар  ин  бора корманди  масъули соҳа Саидмухтор Олимов иттилоъ дод.