ЗУҲУРОВ БА РОҲБАРИЯТИ ЭРОН ИЗҲОРИ СИПОС НАМУД

            Душанбе, 30 ноябр.(АМИТ «Ховар», Марзия Саидова).-«Мо аз роҳбарияти Ҷумҳурии Исломии Эрон миннатдорем, ки бо даъвати Ҷумҳурии Тоҷикистон як қисми шаҳрвандони моро, ки ба таври ғайрирасмӣ барои таҳсил ба Эрон омада буданд, ба ватан баргардониданд». Ин нуктаро Раиси Маҷлиси намояндагони  Маҷлиси  Олии Ҷумҳурии Тоҷикистон Шукурҷон Зуҳуров зимни мулоқоташ бо Президенти Ҷумҳурии Исломии Эрон Маҳмуди Аҳмадинажод дар Теҳрон  иброз дошт.      Алҳол,  200 нафар донишҷӯёни тоҷик бе мувофиқа  бо мақомоти марбутаи Тоҷикистон дар бахши динии донишгоҳҳои байналмилалии   Теҳрон, Қум, Гургон ва Машҳад таҳсил менамоянд, хуб мебуд, агар ин ҷавонони тоҷик ба риштаҳои илмҳои дақиқ, ҳандаса, тиб ва ғайра, ки Тоҷикистон ба он ниёзи бештар дорад, гузаронида шаванд, афзуд Раиси палатаи поёнии парлумони Тоҷикистон.      Мусоҳибон  вазъи ҳамкориҳои дуҷонибаро дар соҳаҳои  фарҳанг, илму маориф, гиромидошти мероси таърихию фарҳангӣ ва адабии муштарак, таъсиси шабакаи телевизионии кишварҳои форсизабонро баррасӣ карда, аз сатҳи густариши ҳамкориҳо дар ин самт изҳори қаноатмандӣ намуданд. Дар ин хусус ба АМИТ «Ховар» котиби матбуотии Маҷлиси намояндагон Муҳаммадато Султонов аз Теҳрон иттилоъ дод.