ҲАҶМИ БОРКАШОНИИ ТРАНЗИТӢ КАМ ШУД

Душанбе, 30 декабр. (АМИТ «Ховар», Лаззат Диловарзод).- Бино ба маълумоти Агентии омори назди Президенти ҶТ, дар давоми 11 моҳи соли 2010 ҳаҷми боркашонии нақлиёти роҳи оҳан  нисбат ба ҳамин давраи соли гузашта 3 млн. 807 ҳазор тонна кам шуд ва дар маҷмӯъ 9 млн. 511 ҳазор тоннаро ташкил дод.    Камшавии ҳаҷми боркашонӣ асосан аз ҳисоби борҳои транзитӣ ба амал омадааст. Ҳаҷми боркашонӣ дар дохили кишвар аз рӯи қитъаҳои КВД «Роҳи оҳани Тоҷикистон» чунин аст: дар қитъаи роҳи оҳани вилояти Суғд 6 млн. 371 ҳазор тонна км, дар қитъаи роҳи оҳани Душанбе (якҷоя бо НТҶ) — 2 млн. 745 ҳазор тонна км ва дар қитъаи роҳи оҳани вилояти Хатлон  394 ҳазор тонна км бор кашонида шудааст. Дар ин давра тавассути нақлиёти роҳи оҳан 15 ҳазор қатора (вагон) мол бор карда шуда, 73 ҳазор қатора (вагон) аз бор холӣ карда шудааст. Ҳамаи борҳо мувофиқи ҷадвал фиристода шудаанд ва аз ҷониби фармоишгарон  ба КВД «Роҳи оҳани Тоҷикистон» ҳеҷ гуна даъво ворид нашудааст.