15 000 ДОЛЛАР БАРОИ ТАЪМИРИ ҶӮЙБОР

Роштқалъа,  3 декабр. (АМИТ «Ховар», Л.Додо). – Бо ибтикори мақомоти иҷроияи  ҳокимияти давлатии  ноҳияи  Роштқалъа    ва бо кӯмаки   Бунёди  Оғохон таъмири ҷӯйбори  калони  Шоҳбурон, ки  қариб  600 гектар  замини  кораму  чарогоҳҳои ноҳияро  обёрӣ мекунад,  оғоз  гардид. Ба  хотири   пурра ва хушсифат анҷом додани  таъмир  15  ҳазор  доллари амрикоӣ маблағ ҷудо  гардидааст. Тавре  масъулин  иттилоъ доданд,    таъмири канал бинобар ду  сабаб оғоз шудааст:  аввал ин ки ҷӯйбор  аз  синаи  регзор мегузарад ва  қисми зиёди обро  замин  ба  комаш фурӯ мекашад. Ва  баъдан  бар  асари  ин ҳолат дар  қисмати  поёнии ҷӯйбор  лағжишу фурӯравии   замин  оғоз  гардидааст. Ба  хотири  пешгирии   камшавии обу лағжиши   замин  дар таъмири ҷӯйбор ба ҷои  семент полиэтиленро истифода  мебаранд. Ба  гуфти  мутахассисон аз полиэтилен солҳои  тӯлонӣ  об  намегузарад. Масъулин  иттилоъ доданд, ки то оғози  кишту  кори баҳорӣ   таъмири  ҷӯйбор ба  сомон  мерасад.