78 МЛН. 468 ҲАЗОР ДОЛЛАР ЁРИИ БАШАРДӮСТОНА

Душанбе, 1 декабр. (АМИТ «Ховар», Лаззат Диловарзод).- Бино ба маълумоти Агентии омори назди  Президенти ҶТ, дар моҳҳои январ — октябри соли чорӣ ба Ҷумҳурии Тоҷикистон 47 мамлакати хориҷии дур ба маблағи 78 млн. 468 ҳазор доллар ё 23 ҳазору 727 тонна ёрии башардӯстона ворид намуданд. Аз он ҷумла: ба миқдори 2891 тонна,  ё ки ба маблағи 6 млн. 176 ҳазор доллари амрикоӣ  равғани растанӣ, 14 ҳазору 702 тонна орд,  ки қиммати он  ба   7 млн. 351 ҳазор доллари амрикоӣ баробар аст,  93 тонна гандум, ба маблағи 47 млн. доллар  доруворӣ, ба андозаи 3 млн. 155 ҳазор доллар либос, пойафзол ва инчунин ба маблағи беш аз 10 млн. доллар озуқа, кӯрпаю болишт, дастгоҳҳои тиббӣ, асбобҳои маишии электронӣ, компютерҳо ва қисмҳои эҳтиётӣ барои  онҳо ба Ҷумҳурии Тоҷикистон ворид карда шудааст.    Аз ҷумлаи мамлакатҳои ёрирасон таносуби бештар аз рӯи арзиши ёрии башардӯстона  ба  ИМА (57,6 фоиз) дода мешавад.    Аз мамлакатҳои ИДМ дар ҷои аввал Ҷумҳурии Қазоқистон (бо 9,3 фоиз) ва Россия (бо 3,9 фоиз) дар ҷои дуюм қарор доранд.