ЧОЙ НИЗ РӮЗИ ҶАШН ДОРАД

              Душанбе, 15 декабр.(АМИТ «Ховар», Назокат Қодирова).-  Ҳамасола 15 декабр дар ҳамаи кишварҳое, ки мақоми истеҳсолкунандаи ҷаҳонии чойро соҳибанд, ҳамчун рӯзи умумиҷаҳонии чой таҷлил мегардад. Ин рӯз бо мақсади ҷалби диққати давлатҳо ва шаҳрвандон ба масоили истеҳсол ва фурӯши чой, алоқаи байни фурӯшандагони чой ва ҳолати кормандони корхонаҳои чойбарорӣ, муносибати истеҳсолгарону истеъмолгарон ҷашн гирифта мешавад.               Қарор дар бораи  маҳз 15 декабр ҷашн гирифтани рӯзи байналмилалии чой пас аз муҳокимаи чандинкарата дар бисёр ташкилотҳои байналмилалӣ ва иттифоқҳои касаба, ҳамчунин дар Форуми умумиҷаҳонии ҷамъиятие, ки соли 2004-ум дар шаҳри Мумбайи Ҳиндустон ва соли 2005-ум дар Порт Аллегреи Бразилия баргузор  шуда буд, қабул гардид.  Рӯзи байналмилалии чой асосан дар он кишварҳое таҷлил мегардад, ки  истеҳсоли чой дар болоравии иқтисодиёти онҳо ҷойи намоёнро ишғол менамояд. Ин давлатҳо  Ҳиндустон, Шриланка, Бангладеш,  Непал, Хитой, Ветнам, Индонезия, Кения, Малайзия, Уганда ва Танзания мебошанд.                Сиёсати байналмилалии тиҷорат, ки аз ҷониби Ташкилоти умумиҷаҳонии савдо гузаронида мешавад, бар ин назар аст, ки давлатҳои истеҳсолкунандаи чой сарҳадҳои худро барои тиҷорат мекушоянд. Давлати Ҳиндустон дар сиёсати савдои берунии чой тағйироти назаррас ворид намудааст.                 Чой ҳамчун нӯшокӣ ҳанӯз дар соли 2737-уми то солшумории мо аз ҷониби шоҳаншоҳи дуюми Хитой Шен Нунг ҳангоми ба пиёлаи пур аз оби ҷӯшида партофтани барги дарахт  кашф шудааст.   Солҳои 400–600-и то солшумории мо дар Хитой иштиёқ ба чой ҳамчун ба нӯшокии табобатӣ меафзояд ва ин боиси равнақёбии раванди пайдоиш ва истеҳсоли чой мегардад. Бисёр дӯстдорони чой имрӯзҳо ба ин нӯшокӣ мувофиқи завқи худ пиёз, анҷир, пораҳои афлесун ва дигар маводи хушбӯйкунанда илова менамоянд.                 Бояд гуфт, ки Тоҷикистон кишварест, ки мардумаш ба истеъмоли чой таваҷҷӯҳи калон доранд. Чой ба ҷумҳурии мо асосан аз давлатҳои Ҳиндустон, Озарбойҷон ва Эрон ворид мегардад. Чой нӯшокии маъмулиест, ки онро дар ҳар хонадон истифода мебаранд.