ДИПЛОМАТИ ҲИНДУСТОН ДАР СУҒД

         Душанбе, 24 декабр. (АМИТ «Ховар», Бекназари Абӯбакр). – Имрӯз раиси шаҳри Хуҷанд Содиқҷон Мирхолиқов бо сафири Ҳиндустон дар Ҷумҳурии Тоҷикистон Аситх Бхаттачардҷи мулоқот кард. Зимни мулоқот С. Мирхолиқов дар бораи шаҳри Хуҷанд, гузашта ва имрӯзи он, дастовардҳои хуҷандиён дар 20 соли истиқлолияти давлатии Ҷумҳурии Тоҷикистон, ҳамкории шаҳрдорӣ бо кишварҳои хориҷи дуру наздик дар ҳамаи соҳаҳои хоҷагии халқ, аз ҷумла бунёди корхонаҳои муштараки саноатӣ маълумот дод. Аситх Бхаттачардҷи омодагии сафорати Ҳиндустонро ба рушди ҳамкорӣ дар  соҳаҳои маориф ва илму фарҳанги Хуҷанд, ҳамчунин дигар соҳаҳо иброз дошт. Дар ҷараёни ин сафар дипломатии ҳиндӣ аз осорхонаи вилоятии ба номи академик Бобоҷон Ғафуров дидан карда, бо устодону донишҷӯёни Донишкадаи политехникии Донишгоҳи  технологии Тоҷикистон ба номи академик Муҳаммад Осимӣ мулоқот кард. Ҳамчунин, сафири Ҳиндустон дар Тоҷикистон аз корхонаи муштараки «Ҷавонӣ», минтақаи озоди иқтисодии «Суғд», корхонаи воҳиди давлатии «Суғдфармация» дидан мекунад. Аз маркази иттилоот ва таҳлили маъмурияти Хуҷанд ба АМИТ «Ховар» иттилоъ доданд, ки сафари Аситх Бхаттачардҷи дар вилояти Суғд се рӯз идома хоҳад кард.