ФЕСТИВАЛИ «НАВОЗАНДАИ ҶАВОН» БАРГУЗОР МЕШАВАД

Душанбе, 2 декабр. (АМИТ «Ховар», Дилшодаи Ҷонмард). — Аз 20 то 24 декабри соли равон дар Консерваторияи миллии Тоҷикистон ба номи Талабшо Сатторов давраи дуюми Фестивали ҷумҳуриявии «Навозандаи ҷавон» баргузор мегардад. Дар он зиёда аз 100 нафар навозандагони наврас, аз тамоми муассисаҳои таълимии ибтидоӣ ва миёнаи мусиқии минтақаҳои ҷумҳурӣ иштирок хоҳанд кард. Онҳо дар бахшҳои фортепиано, созҳои ториву нафасии аврупоӣ ва миллӣ маҳорати иҷрокунандагии худро нишон медиҳанд. Бояд ёдрас шуд, ки даври аввали фестивал аз 20 ноябри соли равон дар муассисаҳои таълимии ибтидоӣ ва миёнаи мусиқии ҳар як шаҳру навоҳии ҷумҳурӣ оғоз гардида буд, ки ғолибон ба даври дуюм роҳхат гирифта буданд. Фестивали мазкур дар доираи барномаи давлатии рушди мусиқии касбӣ бахшида шуда, ҳадаф аз он баланд бардоштани завқи толибилмон ва ҳавасмандгардонии навозандагони наврас, хусусан пайдо кардани истеъдодҳои беҳтарин мебошад. Ҳамчунин, ба ғолибон ва иштирокчиёни фестивал Муассисони фестивал — Вазорати фарҳанги Ҷумҳурии Тоҷикистон ва Муассисаи давлатии телевизиони «Баҳористон» ҷоизаҳо ва тӯҳфаҳои хотиравӣ  таъсис додаанд, ки пас аз ҷамъбасти фестивал қадрдонӣ мешаванд. Дар ин бора аз маркази матбуоти Вазорати фарҳанг хабар доданд.