МАҲФИЛИ ЭҶОДӢ ВА РӮНАМОИИ КИТОБИ НАВИ КАМОЛ НАСРУЛЛО

Душанбе, 27 декабр. (АМИТ«Ховар», Дилшодаи Ҷонмард).- 25 декабр дар толори хурди Иттифоқи нависандагон маҳфили эҷодӣ ва рӯнамоии маҷмӯаи ашъори нави Шоири халқии Тоҷикистон Камол Насрулло  «Рӯ ба меҳроби Ватан» баргузор гардид.    Маҳфилро раиси Иттифоқи нависандагон Меҳмон Бахтӣ бо сухани муқаддимавӣ оғоз намуда, Камол Насруллоро аз фаъолтарин шоирони имрӯз ном бурд ва китоби «Рӯ ба меҳроби Ватан»-ро  як марҳилаи тоза дар роҳи эҷодии ӯ арзёбӣ кард.    Сипас, шоирон ва адабиётшиносону мунаққидон дар бораи махсусиятҳои  шеъри Камол дар манзари шеъри муосири тоҷик ибрози назар намуда, таъкид бар он доштанд, ки Камол Насрулло аз чеҳраҳои фарҳехтаи адабиёти мост, мавқеи устувори шаҳрвандӣ, инъикоси набзи ҳассостарин падидаҳаи замон, баёни рӯшан ва бадеияти баланди хоса сифатҳои муҳимтарини шеъри ӯст.    Дар поёни маҳфил Камол Насрулло аз ашъори тозаэҷодаш намунаҳо қироат кард.