МАЪДАН САМТИ АФЗАЛИЯТНОКИ РУШДИ ИҚТИСОДӢ

Душанбе, 2 декабр. (АМИТ «Ховар», Лаззат Диловарзод).-  Бино ба гуфти корманди илмии Пажӯҳишгоҳи масъалаҳои об, гидроэнергетика ва экологияи Академияи илмҳои ҷумҳурӣ Ҳусайн Аброров, 80 фоизи конҳои тиллои   иктишофгардида дар кӯҳистони Зарафшон воқеанд.    Ба гуфти ҳамин манбаъ, дар як тонна маъдани кони тиллои Чӯлбой ба ҳисоби миёна 6,7 гр. тилло ва 2,6 гр. нуқра мавҷуд аст. Дар як тонна шағалу зароғанҳои канори дарёи Зарафшон бошад, 2,6 гр.   ва дар рӯди Шинг 4,5 гр. тилло мавҷуд аст. Аз ин хотир ташкили ширкатҳои заршӯӣ ҳам ба косибон  ва ҳам ба давлат фоидаовар буда, садҳо одамонро метавон ба корҳои мавсимӣ ҷалб кард.    Дар сурати роҳандозӣ шудани корхонаҳои нави истихроҷ ва коркарди тилло дар ҳавзаи рӯди Киштӯди ноҳияи Панҷакент, ки дорои захираи 75 тонна тилло мебошад, истеҳсоли ин метали қиматбаҳо зиёд хоҳад шуд.           Айни замон барои истихроҷи маъдани кони тилло озмун эълон гаштааст.   Амалӣ шудани   тарҳи нав имкон медиҳад, ки муносибатҳои нави иқтисодӣ бо давлатҳои хориҷӣ барқарор гардида, рушди иқтисоди кишвар тавассути саноати маъдани кӯҳӣ, ки самти афзалиятноки иқтисодӣ  маҳсуб меёбад, даҳчанд беҳтар гардад.