МАСЪУЛИЯТИ ПАДАРУ МОДАР МЕАФЗОЯД

Душанбе, 30 декабр. (АМИТ «Ховар», Дилшодаи Ҷонмард).-29 декабри соли 2010  дар толори мақомоти иҷроияи маҳаллии ҳокимияти давлатии ноҳияи Рашт мулоқоти роҳбарияти Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон бо ҷавонони ноҳияҳои Нуробод, Тавилдара, Рашт, Тоҷикобод ва Ҷиргатол оид ба баррасии лоиҳаи Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» баргузор гардид. Дар ҷараёни чорабинӣ дар доираи лоиҳаи Қонун масъалаҳои таҳсили наврасон ва ҷавонон дар шароити ҷомеаи муосир, ташвиқу тарғиби ташаккули тарзи ҳаёти солим, пешгирии омилҳои номатлуб, аз қабили ҷинояткорӣ, тамоюлҳои иртиҷоӣ, бекоргардӣ, нашъамандӣ, нашъаҷаллобӣ ва муҳоҷирати ғайрирасмии меҳнатӣ баррасӣ гардид, ки аз ҷониби иштирокдорон хуб пазируфта шуд. Дар чорабинӣ ҷавонони маҳаллӣ оид ба масъулияти баробар доштани  падару модар ҳарф зада, аз ҷумла манъ кардани харид ва фурӯши маводи машруботӣ ва тамоку ба кӯдаконро  мавриди баррасӣ қарор  доданд.