МУБОРИЗА БО КОРРУПСИЯ

Хоруғ,  22 декабр. (АМИТ «Ховар»,  Л.Додо). – Кормандони раёсати Агентии  назорати  давлатии молиявӣ ва  мубориза бо  коррупсияи ВМКБ  доир ба  пешгирӣ, ошкор ва ба  ҷавобгарӣ   кашидани  гурӯҳҳои  ҷиноятпеша фаъолияташонро  пурзӯр  менамоянд. Ҷиноятҳои  коррупсионӣ фаъолияти  мӯътадили мақомоти  давлатиро  халалдор ва  ба  раванди  рушди  иҷтимоиву  иқтисодӣ таъсири  манфӣ  мерасонанд. Самти  муҳими  фаъолияти  раёсатро  сардори  он  Шодибек Ҷавов зимни  гузаронидани  таҳлилу  санҷишҳо  дар  идораву  корхонаҳо доир  ба  истифодаи  мақсадноки  маблағҳо  муайян  намуд. Давоми  11 моҳи  соли  ҷорӣ  кормандони  раёсат  дар  80  муассисаву  корхонаҳо  иҷрои  қисми  даромад ва  хароҷотро  мавриди  таҳлил  қарор  доданд.   Санҷишҳо  нишон   доданд, ки  аз  аввали сол инҷониб  дар идораву  ташкилот 25 ҷинояти хусусияти  коррупсионӣ дошта,  аз  ҷумла ҳодисаҳои сохтакории  хизматӣ,  тасарруфи пулу мол  ошкор  шуданд. Маблағи  зарар  дар ҳаҷми 729705 сомонӣ рӯёнида шуда, аз  ин ҳисоб  114863  сомонии он ба буҷа  ворид  гардид.