МУЛОҚОТИ ЭМОМАЛӢ РАҲМОН БО НУРСУЛТОН НАЗАРБОЕВ

Душанбе, 2 декабр. (АМИТ «Ховар»).- Имрўз дар шаҳри Остона Президенти Ҷумҳурии Тоҷикистон Эмомалӣ Раҳмон бо Президенти Ҷумҳурии Қазоқистон Нурсултон Назарбоев мулоқот намуд. Сарвари давлати Тоҷикистон Эмомалӣ Раҳмон нахуст Нурсултон Назарбоевро бо ҷараён ва анҷоми босамари ҳамоиши Созмони амният ва ҳамкорӣ дар Аврупо табрику таҳният гуфта, аз раёсати Қазоқистон чун як кишвари минтақаи мо дар ин созмони бонуфузи ҷаҳонӣ изҳори хушнудӣ намуд. «Тоҷикистон ҳамеша аз ҳамаи тадбиру ташаббусҳое, ки кушодагии минтақаи моро ба ҷаҳониён нишон медиҳанд, дастгирӣ мекунад», — таъкид дошт Сарвари давлат Эмомалӣ Раҳмон. Аз мўҳтаво ва рушди муносибатҳои дуҷонибаи Тоҷикистону Қазоқистон низ, аз ҷумла аз фаъол гаштани Фонди муштараки сармоягузорӣ, изҳори қаноатмандӣ карда шуд. Густариши ҳамкорӣ дар татбиқи лоиҳаҳои муштарак дар соҳаҳои  саноати сабук, хўрокворӣ ва кўҳкорӣ, дар истеҳсоли масолеҳи сохтмонӣ ва бунёди нерўгоҳҳои хурду миёнаи обӣ дорои дурнамои умедбахш арзёбӣ гардид. Изҳори боварӣ карда шуд, ки то баргузории қарибулвуқуи Шўрои байнидавлатии Тоҷикистону Қазоқистон созишномаҳои нав барои татбиқи лоиҳаҳои муштараки иқтисодию сармоягузорӣ омода мегарданд. Гуфтугўйи судманд ҳамчунин оид ба рушди ҳамкории минтақавӣ ва таҳкими амнияту субот дар Осиёи Марказӣ сурат гирифт. Дар ин бора ба АМИТ «Ховар» аз Хадамоти матбуоти Президенти Ҷумҳурии Тоҷикистон иттилоъ доданд.