МУТТАҲИДИИ ҶАВОНОНИ МИНТАҚАИ РАШТ

Душанбе, 30 декабр. (АМИТ «Ховар», Дилшодаи Ҷонмард).-29 декабри соли 2010 дар маркази ноҳияи Рашт даври ҷамъбастии маҳфили ҳозирҷавобон зери унвони «Ташаббусҳои хайрхоҳона – кафили саломатии ҷавонон» бо иштироки 5 даста аз ҳисоби ихтиёриёни   ноҳияҳои Нуробод, Тавилдара, Рашт, Тоҷикобод ва Ҷиргатол баргузор гардид. Мақсад аз баргузории чорабинии мазкур ташвиқу тарғиби ташаккули тарзи ҳаёти солим, пешгирии омилҳои номатлуб, аз қабили ҷинояткорӣ, тамоюлҳои иртиҷоӣ, бекоргардӣ, нашъамандӣ ва нашъаҷаллобӣ миёни ҷавонон мебошад. Дар ҷараёни чорабинӣ зиёда аз 3000 наврасон ва ҷавонон бо иттилооти зарурӣ фаро гирифта шуданд. Дар даври ниҳоии маҳфил роҳбарияти Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон иштирок ва суханронӣ намуда, ғолибон ва иштирокдоронро бо тӯҳфаҳои хотиравӣ сазовор гардониданд.