НИГИНАИ ҲУНАР САҲНАРО ТАРК НАМУД

              Душанбе, 22 декабр, (АМИТ «Ховар»).-Сарояндаи машҳур, Ҳунарпешаи мардумии Тоҷикистон Нигина Рауфова дар синни 65 солагӣ аз бемории сактаи қалб аз дунё чашм пӯшид.             Марҳум аз соли 1989 то ба нафақа баромадан дар ҳайати ансамбли овозадори «Дарё»-и Кумитаи телевизион ва радиои назди Ҳукумати Ҷумҳурии Тоҷикистон кору фаъолият менамуд. Солҳои тӯлонӣ ӯ дар ансамбли давлатии «Шашмақом»-и Филармонияи давлатии Тоҷикистон кор кардааст. Тӯли фаъолияти хеш барои саҳми назаррасаш дар пешрафти соҳаи фарҳангу ҳунар бо ҷоизаи давлатии ба номи Рӯдакӣ ва чандин ифтихорномаҳо сарфароз гардидааст.             Нигина Рауфова 21 майи соли 1945 дар ноҳияи Файзобод ба дунё омада, соли 1975 фаъолияти кориашро дар ҳайати ансамбли «Рубобчизанон» оғоз намудааст. Аз соли 1975 сар карда, дар Кумитаи телевизион ва радиошунавонӣ ба фаъолият пардохтааст. Сурудҳои  «Аскарбача», «Бӯи гул», «Қадат баланд аст», «Духтари каҷтоқӣ», «Нозам ба чашмонат», «Наргиси шаҳло» ва дигарҳо аз зумраи беҳтарин ва машҳуртарин сурудҳои ӯ ба шумор мераванд.