ҲАЛОКАТИ НОБОЛИҒ ДАР НАТИҶАИ САДАМАИ НАҚЛИЁТӢ

   Душанбе, 17 январ. (АМИТ «Ховар», Анварбек Сиддиқов).- Аз аввали соли ҷорӣ то 16 январ дар ҷумҳурӣ 63 садамаи нақлиётӣ ба қайд гирифта шудааст. Дар натиҷа 19 нафар ҳалок ва 78 нафар ҷароҳати гуногуни ҷисмонӣ бардоштанд. Дар ин бора ба АМИТ «Ховар» аз дафтари матбуоти Раёсати бозрасии давлатии автомобилии ВКД-и Ҷумҳурии Тоҷикистон хабар доданд.  Садамаи нақлиётие, ки рӯзи 8 январ дар Ваҳдат ба вӯқуъ пайваст, кормандони раёсати тафтишотии Раёсати бозрасии давлатии автомобилии ВКД-и Ҷумҳурии Тоҷикистон тавонистанд дар таърихи 16 январ ин ҳодисаро ошкор намоянд. Ронандаи автомобили «Toyota Corolla», рақами давлатиаш ВМ 70 67 РТ 01 Маҳмадшоҳ Абдуалимов (соли таваллудаш 1983) дар тӯи ҳамширааш дар деҳаи Тангаии ҷамоати Ромити шаҳри Ваҳдат ҳангоми автомашинаро ба қафо рондан аз беэҳтиётӣ ҷияни ноболиғи худро зер мекунад. Дар натиҷа ҷабрдида ҷароҳати ҷисмонӣ бардошта дар беморхонаи марказии шаҳри Ваҳдат ба ҳалокат мерасад.   Нисбат ба ин ҳодиса парвандаи ҷиноӣ оғоз гардид.