19% АФЗУДАНИ МАҲСУЛОТИ ХӮРОКВОРӢ ДАР СУҒД

   Душанбе, 21 январ. (АМИТ «Ховар», Бекназари Абӯбакр). — Солҳои охир дар қаламрави вилояти Суғд соҳаи саноат, бахусус саноати сабук бо суръат густариш ёфта, истеҳсоли мол ва маҳсулоти ниёзи мардум афзудааст. Дар соли сипаришуда нисбат ба соли 2009 дар қаламрави вилоят истеҳсоли қувваи барқ, ангишт, газ, хишти сохтмонӣ, семент, қолинҳо ва маснуоти қолинӣ, матои тайёри пахтагин, либосҳои дӯхташуда, мебел, пойафзол, истеҳсоли нон, гӯшт, орд, панир, оби маъданӣ, оби ҷав, сигарет ва коняк бештар гардидааст.     Аз хадамоти матбуоти раиси вилояти Суғд ба АМИТ «Ховар» иттилоъ доданд, ки истеҳсоли маводи ниёзи мардум бо ҳисоби нӯшокиҳои спиртӣ давоми соли 2010-ум 702373,5 ҳазор сомониро ташкил намуд, ки нисбат ба соли 2009-ум 114354,3 ҳазор сомонӣ ё худ 19,5 фоиз зиёд аст.  Аз ҷумла, истеҳсоли маҳсулоти хӯрокворӣ 578150,5 ҳазор сомониро ташкил намуд, ки дар қиёс бо соли 2009-ум 92436,5 ҳазор сомонӣ ё ин ки 19 фоиз зиёд мебошад.