БАРНОМАСОЗОНИ ШӮРООБОД ЗИЁД МЕШАВАНД

    Шӯрообод, 27 январ. (АМИТ «Ховар», С. Холов). – Бо шуғл фаро гирифтани аҳолӣ, муҳайё намудани ҷойҳои нави корӣ ва ба ин васила паст намудани сатҳи камбизоатии мардум аз масъалаҳои муҳим ба шумор меравад. Бо ин мақсад аз тарафи шӯъбаи Агентии давлатии ҳифзи иҷтимоӣ, шуғли аҳолӣ ва муҳоҷирати ноҳияи Шӯрообод дар соли сипаригардида 12 ярмаркаи ҷойҳои кории холӣ гузаронида шуда, 96 нафар шаҳрвандони ноҳия, аз ҷумла 50 нафар зан бо ҷои кори доимӣ таъмин гардиданд. Ҳамзамон дар ин муддат 237 шаҳрванди бешуғл ба корҳои муздноки ҷамъиятӣ ҷалб гардиданд.     Таъсиси ҷойҳои нави корӣ дар ноҳия аз ҳисоби ташкили хоҷагиҳои деҳқонӣ ва ҷалби шаҳрвандон ба корҳои мавсимӣ ба 1390 ҷой расонида шуда, 131 нафар шаҳрвандони ноҳия курсҳои омӯзиширо бо ихтисоси кафшергари газию барқӣ, дӯзанда ва барномасоз хатм намуданд.