БАРРАСИИ ВАЗЪИ МАОРИФ

   Суғд, 27 январ. (АМИТ «Ховар», Самад Юсуфӣ, М. Амонов).-Дар толори маҷлисгоҳи шӯъбаи маорифи ноҳияи Б.Ғафуров вохӯрии роҳбарони муассисаҳои таълимӣ бо ҷонишини раиси вилоят Мавҷуда Бобоева баргузор гардид, ки дар он пиромуни пешрафти соҳаи маориф, вазъи таълиму тарбия дар вилоят сухан рафт.    Абдураҳмон Абдуҳамидов – сарвари МТМУ №15 пешниҳод намуд, ки барои пешбурди кори таълиму тарбия ва баланд бардоштани нуфузи соҳаи маориф дар вилоят донишгоҳи махсуси педагогӣ ташкил намудан зарур аст.   Бурҳонов Абдуалӣ- сарвари МТМУ №25 гуфт, ки барои баланд бардоштани сатҳи зиндагии муаллимон бояд дар назди шӯъбаи маориф фонди махсуси иҷтимоӣ ташкил шавад.     Нурмуҳаммад Ниёзӣ – сарвари Гимназияи «Нур» пешниҳод намуд, ки барои баланд бардоштани сатҳи дониши хонандагон ва рушду нумӯи соҳаи маориф ва таълиму тарбия андозбандӣ аз мактабҳои хусусӣ бояд бардошта шавад.    Дар фарҷом мудири шӯъбаи маорифи ноҳия Дилбар Турсунова фикри ҳамагонро ҷамъбаст намуда, иқдоми неки кормандони соҳаи маорифи ноҳияро, ки аз ҳисоби маоши серӯзаи худ 36 ҳазор сомонӣ ҷамъ намуда, ба мактабҳои №72, №36, №39 чун кӯмаки моддӣ расониданд, ҳимматбаландӣ номид. Ин маблағро комиссияи бо салоҳият аз суратҳисоби махсуси шӯъбаи маорифи ноҳия ба ин мактабҳо ирсол намуд.