БУНЁДИ САДД БАРОИ СОҲИЛМУСТАҲКАМКУНӢ

    Кӯлоб, 28 январ. (АМИТ «Ховар», С.Холов). – Бо мақсади пешгирии хавфи сар задани офатҳои табиӣ, бахусус селу обхезиҳо ҷараёни корҳои соҳилмустаҳкамкунӣ дар соҳили сою дарёҳои минтақаи Кӯлоб зери назорати Ҳукумати Ҷумҳурии Тоҷикистон қарор гирифтааст. Дар соҳилҳои сойи Даҳанаи ноҳияи Кӯлоб бо ҷалби техникаи зарурӣ нахуст мавзеъҳое мустаҳкам мешаванд, ки бар асари боронҳои сели соли 2010 рахна гардида, ба хоҷагии халқ зиёни ҷиддӣ ворид намуданд.    Мувофиқи нақша корҳои соҳилмустаҳкамкунӣ то оғози моҳи апрел идома ёфта, барои ин кор маблағҳои зарурӣ, симтӯру маводи сӯзишворӣ ва техника ҷудо гардидаанд. Илова ба тадбирҳои андешидаи ҲҶТ дар ноҳияи Ховалинг ҳокимияти маҳаллӣ баҳри пешбурди корҳои соҳилмустаҳкамкунӣ соҳибкоронро низ ҷалб намудааст. Айни замон дар ҷамоатҳои деҳоти Сариосиёб дар соҳили чапи дарёи Сурхоб, ки ҳамасола бар асари омадани сел рахна мегардид, соҳибкор Саймуҳаммад Раҷабалиев бо ҷалби техникаи шахсӣ ва як гурӯҳи сохтмонӣ ба бунёди садди муҳофизатӣ машғуланд.    Бояд гуфт, ки баҳри дастгирии соҳибкорон ҳокимияти маҳаллӣ барои ташкили хоҷагии моҳипарварӣ дар ин мавзеъ иҷозат додааст ва дар баробари бунёди саддҳо, ин ҷо аллакай 6 ҳавз омода гардида, дар оғози фасли баҳор боз як хоҷагии моҳипарварӣ ба фаъолият шурӯъ менамояд.