ДАР ТОҶИКИСТОН МУҲОҶИРИНИ ХОРИҶӢ ЗИЁДАНД?

Душанбе, 27 январ. (АМИТ «Ховар», Покиза Маҳмадбекова). — Имрӯзҳо дар кишвари мо 2360 муҳоҷири меҳнатии хориҷӣ, ки зиёда аз 60 фоизашро шаҳрвандони Ҷумҳурии Мардумии Чин ташкил медиҳанд, фаъолият  доранд. Аз Агентии омори назди Президенти Ҷумҳурии Тоҷикистон ба хабарнигори АМИТ «Ховар»  иттилоъ доданд, ки дар Тоҷикистон, ҳамчунин, 240 нафар шаҳрванди Афғонистон, 124 нафар шаҳрванди Туркия ва зиёда аз 100 нафар шаҳрванди кишвари Ҳиндустон кор мекунанд.  «Соли 2010 барои дарёфти музд ба  Федератсияи Русия 735 ҳазор шаҳрванди Тоҷикистон сафар намуданд. Аз ин шумора 12 фоизашро занон ташкил медиҳанд», — зикр намуд манбаъ. Ёдовар мешавем, ки тибқи иттилои Раиси Бонки миллии Ҷумҳурии Тоҷикистон Шариф Раҳимзода тайи 11 моҳи соли гузашта муҳоҷирони меҳнатии тоҷик ба воситаи низоми бонкӣ ба оилаҳои худ 2,1 млрд. доллари ИМА маблағ равон кардаанд.