ФАЪОЛИЯТИ ҒАЙРИҚОНУНИИ НАМОЯНДАГОНИ ШИРКАТҲОИ ХОРИҶӣ

Душанбе, 7 январ. (АМИТ «Ховар», Покиза Махмадбекова). — Дар рафти таҳлилҳо соли равон аз тарафи кормандони мақомоти андоз нисбати 43 нафар барои вайрон кардани қонунгузории андоз протокол тартиб дода шуд.  Ба мухбири АМИТ «Ховар» аз Кумитаи андози назди Ҳукумати Ҷумҳурии Тоҷикистон  иттилоъ доданд, ки барои истифода набурдани мошинаҳои назорати хазинавии дорои хотираи фискалӣ, сари вақт пешниҳод накардани эъломияҳои андоз, кам нишон додани маоши кормандон ва бе қайд дар мақомоти андоз ба фаъолияти соҳибкорӣ машғул шудан нисбати 43 нафар протокол тартиб дода шуда, маблағи он пурра ба буҷет ворид карда шуд. Мувофиқи маълумоти аз мақомоти дахлдор дастрасгардида, шумораи шахсони воқеӣ-ғайрирезидентҳо, ки барои анҷом додани фаъолияти касбӣ ба ҷумҳурӣ ворид шудаанд, айни ҳол 6204 нафарро ташкил менамояд. Айни замон робита ва ҳамкориҳои судманди Ҷумҳурии Тоҷикистон бо мамолики дуру наздик дар доираи ташкилоти минтақавию байналмилалӣ рӯз то рӯз вусъати тоза мегиранд. Ин ба субъектҳои хоҷагидор, соҳибкорони инфиродӣ ва шахсони воқеии ин давлатҳо имкониятҳои васеъ фароҳам меоварад, то ки дар ҳудуди Ҷумҳурии Тоҷикистон самарабахш фаъолият намоянд. Бинобар ин, онҳоро зарур аст, ки дар ин самт қонунгузории Ҷумҳурии Тоҷикистонро риоя карда, сари вақт аз қайди мақомоти андоз гузаранд, эъломияҳои андозро ба нозироти андоз пешниҳод намоянд ва дар ин замина ба ғанӣ гардидани буҷети давлатӣ саҳми босазои худро гузоранд,- афзуд манбаъ