ШЕЪРДӮСТ: АКАДЕМИЯИ ИЛМҲОИ ҶТ МАКОНИ МУҚАДДАС АСТ

   Душанбе, 12 январ. (АМИТ «Ховар», Гулрӯ Ниёзова).-Дар бинои Академияи илмҳои Ҷумҳурии Тоҷикистон «Утоқи фарҳанги Эрон» кушода шуд. Дар маросими кушодашавии он президенти Академияи илмҳои Ҷумҳурии Тоҷикистон Маҳмадшо Илолов ва сафири Ҷумҳурии исломии Эрон дар Тоҷикистон Алиасғари Шеърдӯст иштирок намуданд.    Он аз се утоқи корӣ иборат буда, дорои теъдоди зиёди китобҳои фарҳангӣ мебошад, ки барои истифодаи онҳо шароити мусоид фароҳам оварда шудааст. Ҳадафи кушодашавии ин утоқи фарҳангиро сафири Ҷумҳурии исломии Эрон дар Тоҷикистон Алиасғари Шеърдӯст бахшида ба 20 солагии Истиқлолияти Ҷумҳурии Тоҷикистон ва густариши робитаҳои илмиву фарҳангӣ арзёбӣ кард.   Номбурда дар суханрониаш аз ҷумла зикр намуд, ки «Мо ба Академияи илмҳои Тоҷикистон чун ба як макони муқаддас менигарем. Мо на танҳо дар бахши адабиёт ва фарҳанг, балки дар ҳамаи соҳаҳо ҳамкорӣ дорем».