ТӮҲФА БА ЯТИМОН

 Душанбе, 7 январ. (АМИТ «Ховар», Марзия Саидова). — Намояндагии Кумитаи байналмилалии имдоди имом Хумайнии Ҷумҳурии Исломии Эрон дар Ҷумҳурии Тоҷикистон тасмим гирифтааст, ки  ба 200 нафар духтарони ятим, ки курсҳои  дӯзандагиро хатм кардаанд, як ададӣ мошинаи дарздӯзӣ тақдим намояд. Сайидҷаводи Разавӣ раиси намояндагии Кумитаи мазкур дар Тоҷикистон дар сӯҳбат ба хабарнигори  АМИТ «Ховар» гуфт: «мошинаҳои дарздӯзӣ ояндаи наздик ба духтарони бепарастор тақдим мегардад». Мавсуф афзуд, ки ҳудуди беш аз 100 мошинаи дарздӯзӣ ба духтарони бепарастори вилояти Суғд тақдим мешавад. Мавриди  зикр аст, ки аз ҷониби намояндагии Кумитаи имдоди имом Хумайнӣ 18 маркази омӯзишии дӯзандагӣ дар шаҳру ноҳияҳои гуногуни мамлакат   фаъолият менамоянд, ки то ба имрӯз беш аз 3 500 нафар духтарон дар онҳо курсҳои дӯзандагиро хатм кардаанд. Марказҳои мазкур бо мақсади бо ҳунаромӯзӣ, шуғли муайян ва бо ҷойи кор таъмин кардани занону духтарон  ифтитоҳ гардида,  баҳри  беҳдошти вазъи иҷтимоии бонувони тоҷик нақши  муносиб мегузоранд.