«ТОҶИКМАТЛУБОТ» ИМКОНИ ТАЪМИНИ БОЗОРҲО БО МАҲСУЛОТРО ДОРАД?

Душанбе, 19 январ. (АМИТ «Ховар», Покиза Маҳмадбекова). — «Тоҷикматлубот» имрӯз имкони пурра таъмин намудани бозорҳои ҷумҳуриро бо меваи тару тозаи ватанӣ надорад», — тазаккур дод зимни нишасти матбуотӣ, 19 январ раиси Иттифоқи «Тоҷикматлубот» Сироҷиддин Валиев. Ӯ афзуд, ки Раёсати «Тоҷикматлубот» тасмим гирифтааст, ки ҷиҳати пурра таъмин намудани бозорҳои дохилӣ бо меваи худӣ чораҳои муассир андешида, захира ва коркарди меваро ба роҳ монад. «Бо дастуру ҳидоятҳои Сарвари давлат Эмомалӣ Раҳмон солҳои охир бунёди боғу токзор дар қаламрави ҷумҳурӣ вусъат ёфта, истеҳсоли мева низ зиёд мегардад. Аз ин рӯ, бо боварии комил гуфтан мумкин аст, ки дар давоми як ё ду соли наздик метавонем бозорҳои ҷумҳуриро пурра бо меваи худӣ таъмин намоем. Дар баробари ин имкон фароҳам меояд, ки меваҳои Тоҷикистон ба хориҷи кишвар низ содирот шаванд. «Бо мақсади дар тирамоҳу зимистони солҳои 2010-2011 таъмин намудани аҳолӣ бо сабзавоти тару тоза 50 адад гармхона омода шуда, дар онҳо помидор, бодиринг, гулкарам, карам ва кабудиҳо парвариш ёфта истодаанд, ки теъдоди онҳо нисбат ба ҳамин давраи соли гузашта 8 адад зиёд мебошад», — гуфт дар хотима С. Валиев.