ҚАДАМҲОИ МУАССИРИ ТОҶИКИСТОНУ ТУРКИЯ ДАР ҶОДАИ ҲАМКОРӢ

 Душанбе, 5 феврал.(АМИТ «Ховар», Марзия Саидова).-Масъалаҳои тақвияти ҳамкориҳои гуногунсоҳаи Тоҷикистону Туркия дар заминаҳои сиёсию иқтисодӣ, фарҳангӣ ва  байнипарлумонӣ дар мулоқоти Раиси Маҷлиси намояндагон Шукурҷон Зуҳуров бо сафири Туркия дар Ҷумҳурии Тоҷикистон Мехмет Мунис Дирик дар Душанбе баррасӣ гардид.  Шукурҷон Зуҳуров гуфт, ки имрӯз байни ҳар ду кишвар фазои солим ва шароити мусоиди ҳамкориҳо вуҷуд дорад. Ва ин имкониятро бояд самаранок истифода кард. Хусусан, Маҷлиси намояндагон қонуну  санадҳое қабул кардааст, ки ҷиҳати фаъолияти озоди сармоягузорон ба иқтисодиёти Тоҷикистон мусоидат менамояд.  Ба андешаи Ш. Зуҳуров Тоҷикистон бо Туркия дар бахшҳои иқтисодию сиёсӣ ва иҷтимоию фарҳангӣ равобити ҳасанаи судмандро ба роҳ мондааст. Яке аз бахшҳое, ки байни ду кишвар бештар тавсеа  ёфтааст, соҳаи маориф аст. Тибқи созишномаҳои  дар бахши маориф ба тасвибрасидаи Тоҷикистону Туркия дар шаҳрҳои Қӯрғонтеппа, Кӯлоб, Хуҷанд ва Турсунзода  литсейҳои туркӣ фаъолият менамоянд, инчунин теъдоди бештари донишҷӯёни тоҷик дар донишгоҳҳои Туркия ба таҳсил фаро гирифта шудаанд.   Дар  мулоқот ҷонибҳо масъалаҳои густариши ҳамкориҳои судмандро байни Тоҷикистону Туркия дар бахшҳои энергетика, саноат, туризм, кишоварзӣ, коркарди сарватҳои табиӣ ва чарм,  таъсиси корхонаҳои муштарак баррасӣ намуда, пешниҳодҳои ҷолиб баён доштанд.   Сафири Туркия иброз дошт, ки зимни фаъолияти дипломатиаш дар Тоҷикистон тамоми нерӯи худро бобати тавсеаи равобити судманди Тоҷикистону Туркия сафарбар менамояд.