ҚАТЪИ МАҲДУДИЯТИ РӮЗОНАИ НЕРӮИ БАРҚ ДАР ТОҶИКИСТОН

    Душанбе, 22 феврал. (АМИТ «Ховар», Кристина Эрлих). — Шурӯъ аз 20 феврал дар Ҷумҳурии Тоҷикистон   маҳдудияти рӯзонаи нерӯи  барқ бардошта шуд. Дар ин бора ба хабарнигори АМИТ «Ховар» сардори маркази матбуоти ШСХК «Барқи Тоҷик» Нозир Ёдгорӣ иттилоъ дод.     «Акнун тамоми истеъмолкунандагони нерӯи барқ дар ҳудуди ҷумҳурӣ бе маҳдудият нерӯи барқ мегиранд. Меъёри шабонаи маҳдудияти нерӯи барқ танҳо дар он ноҳияҳое боқӣ монд, ки аз аввал дар  он ҷойҳо буд. Маҳдудияти нерӯи барқ дар ин ноҳияҳо аз соати 22.00-и шаб то соати 5.00-и субҳ амал менамояд»,-хабар дод манбаъ.    Ёдовар мешавем, ки бо сабаби гузаштан ба истифодаи фурӯзонакҳои каммасраф, фаъолияти муназзами НБО-и «Сангтӯда-1» ва дигар НБО-и хурд, ҳамчунин истифодаи мақсадноки обанбори Норак дар давраи тирамоҳу зимистони соли ҷорӣ таъмини аҳолии ҷумҳурӣ  бо нерӯи барқ нисбат ба солҳои пешин хеле беҳтар гардид.             Бояд гуфт, ки аҳолии деҳот тӯли ин муддат дар як шабонарӯз 10-14 соат нерӯи барқ мегирифт. Ба андешаи мутахассисон маҳдудияти пурраи нерӯи барқ дар ҷумҳурӣ имсол нисбат ба соли гузашта хеле барвақттар бардошта мешавад.