ҚУВВАҲОИ МУСАЛЛАҲ-НИШОНИ СОҲИБИСТИҚЛОЛӢ

    Душанбе, 19 феврал. (АМИТ «Ховар», Дилшодаи Ҷонмард). — 18 феврал бо ташаббуси Кумитаи ҷавонон, варзиш ва сайёҳии назди Ҳукумати ҶТ  бахшида ба рӯзи таъсисёбии Кувваҳои мусаллаҳи ҶТ чорабинии тантанавӣ баргузор гардид.            Дар чорабинии тантанавӣ тамоми афсарону аскарони  қисмҳои низомӣ иштирок намуданд.    Раиси Кумитаи ҷавонон, варзиш ва сайёҳӣ Маликшо Неъматов  ҳозиринро бо  ҷашн табрик намуда иброз дошт, ки яке аз нишонаҳои олии соҳибистиқлолии Тоҷикистон таъсиси Қувваҳои Мусаллаҳ маҳсуб ёфта, дар давоми  18 соли мавҷудияти худ таҳкиму тақвият ёфта, беҳдошти моддию техникии он баръало эҳсос мегардад.             Дар ҷамъомади тантанавӣ таъкид гардид, ки имрӯз сафи Қувваҳои мусаллаҳи Тоҷикистонро ҷавонони аз ҷиҳати ҷисмонӣ обутоб ёфта пурра карда, қисми дигар бо доштани малакаи баланди ҳарбӣ дар муассисаҳои олии мамлакат баҳри ҳифзи бузургтарин арзишҳои миллии давлати соҳибистиқлоли Тоҷикистон ифтихормандона  хизмат менамоянд.               Маҳз чунин арҷгузорӣ нисбат ба яке аз рукнҳои давлатдорӣ аст, ки бо беҳ гардидани вазъи қисмҳои низомӣ ва бедор намудани ғурури  ватанпарастӣ дар ниҳоди ҷавонон шумораи ихтиёриён  дар сафи Қувваҳои низомии кишвар дар қиёс бо солҳои пешин боло рафтааст.   Дар хатми ҷамъомад беҳтарин афсарони шуҷои ватан бо тӯҳфаҳои хотиравӣ сарфароз гардонида шуданд. Роҳбарону собиқадорони соҳа  ҳар яки онҳоро ба ҳифзи софдилонаю гиромӣ доштани ҳар пора хоки Тоҷикистони азиз давъат намуданд.            Дар поёни ҷамъомад барномаи фарҳангии ҷолиб иборат аз сурудҳои ватандӯстона намоиш дода шуд.