БОЗДОШТИ ДУ ШАҲРВАНДИ НОҲИЯИ РӮДАКӢ БО БАНГДОНА

    Душанбе, 16 феврал. (АМИТ «Ховар», Анварбек Сиддиқов).- Кормандони мақомоти ҳифзи ҳуқуқ ҳангоми гузаронидани амалиёти махсус дар кӯчаи Айнӣ 269-и пойтахт истиқоматкунандаи ҷамоати деҳоти Гулистони ноҳияи Рӯдакӣ Наҷмиддин Бобиев, соли таваллудаш 1991, муваққатан бекорро боздошт намуданд. Ҳангоми кофтуков аз борхалтаи номбурда 1 килограмму 830 грамм маводи нашъадори бангдона ёфт ва мусодира гардид.    Тавре аз маркази матбуоти ВКД-и ҷумҳурӣ ба АМИТ «Ховар» иттилоъ доданд, ғайр аз ин дар таърихи 15 феврал зимни гузаронидани амалиёт дар ноҳияи Синои шаҳри Душанбе истиқоматкунандаи ноҳияи Рӯдакӣ Дилшод Саидов бо гумони нашъафурӯшӣ боздошт гардид. Зимни кофтукоб аз номбурда 2 килограмму 300 грамм бангдона мусодира гардид.    Нисбат ба ин ҳодисаҳо парвандаи ҷиноӣ оғоз гардидааст.