ДАРЁФТИ 22 КГ ҲАШИШ АЗ МОШИН

   Душанбе, 15 феврал. (АМИТ «Ховар», Анварбек Сиддиқов). — Кормандони Агентии назорати маводи нашъаовари назди Президенти Ҷумҳурии Тоҷикистон пеши роҳи интиқоли ғайриқонунии маводи нашъаовар ба Ҷумҳурии Қирғизистонро гирифтанд.   Тавре аз маркази матбуоти Агентии мазкур ба АМИТ «Ховар» иттилоъ доданд, чанд моҳ қабл кормандони раёсати Агентии назорати маводи нашъаовар дар вилояти Суғд фаъолияти гурӯҳи ҷиноятии муташаккилонаро, ки аъзояш шаҳрвандони кишвар ва Ҷумҳурии Қирғизистон буданд, назорат мекарданд. Онҳо нақша доштанд, ки миқдори зиёди маводи нашъаоварро ба Ҷумҳурии Қирғизистон интиқол диҳанд.    Дар натиҷаи гузаронидани амалиёти махсус дар шоҳроҳи «Хуҷанд- Конибодом» автомашинаи тамғаи «Опел — Астра» боздошт гардид. Дар дохили автомашина як шаҳрванди ҷумҳурӣ ва ду шаҳрванди Ҷумҳурии Қирғизистон буданд. Ҳангоми аз назаргузаронии автомашина аз дохили он 16 бастаи селофанӣ, ки дар дохилашон маводи растании дорои бӯи махсус буд, дарёфт ва мусодира гардид.  Мувофиқи хулосаи озмоишию ташхиси судии раёсати Агентии назорати маводи нашъаовари вилояти Суғд маводи мусодирашуда моддаи нашъаовари навъи ҳашиш буда, вазни он 22 килограммро ташкил дод.   Оид ба ин қазия тибқи моддаҳои 32, 200, 289-и Кодекси Ҷиноии Ҷумҳурии Тоҷикистон парвандаи ҷиноӣ оғоз шудааст.