МАЪРАКАИ НИҲОЛШИНОНӢ ДАР БОҒИ МИЛЛИИ «ВАҲДАТ»

Душанбе, 8 феврал. (АМИТ «Ховар», Бекназари Абӯбакр). — Дар ҳашари ниҳолшинонӣ ва ободонӣ санаи 5 феврал дар шаҳру ноҳияҳои вилояти Суғд беш аз 128 000 нафар сокинони вилоят иштирок намуда,  155,5 гектар боғу токзорро бунёд, 67,5 гектар боғҳои кӯҳнаро барқарор намуда, 116 185 бех ниҳол  шинониданд. Аз ҷумла, ниҳолҳои зардолу, шафтолу, себ ва ниҳолҳои сояафкану ороишӣ шинонида шуд. Раиси вилояти Суғд Қоҳир Расулзода дар ин маърака дар боғи миллии «Ваҳдат»-и ноҳияи Бобоҷон Ғафуров ширкат варзида, ба боғдорон ҷиҳати парвариши  ниҳолҳо, дарахтони мевадиҳанда, бахусус навъҳои нодир дастуру маслиҳат дод ва пешниҳод намуд, ки   ҳамкориро бо олимони соҳа тақвият диҳанд. Аз хадамоти матбуоти раиси вилояти Суғд ба АМИТ «Ховар» иттилоъ доданд, ки ҷиҳати васеъ намудани парвариши навъи себи «Ҳусни Юсуф» дар боғи миллии «Ваҳдат» боғдорони хоҷагии «Ругунд»-и ноҳияи Истаравшан дар майдони 1 гектар беш аз 300 бех ниҳолҳои ин навъи себи нодирро шинониданд.        Зикр бояд кард, ки боғи миллии «Ваҳдат» бо ташаббуси Президенти мамлакат Эмомалӣ Раҳмон обод гардида, дар он чойхонаи миллии боҳашамат қомат афрохтааст ва он дорои 630 гектар майдони боғзор мебошад.