«МАЪРИФАТИ ИСЛОМ» ЧАРО ИХТИСОР ГАРДИД?

 Душанбе, 7 феврал. (АМИТ «Ховар», Марзия Саидова). — Минбаъд толибилмони тоҷик ба ҷои фанни «Маърифати ислом» дар мактабҳои таҳсилоти ҳамагонӣ «Таърихи халқи тоҷик» — ро меомӯзанд. «Маърифати ислом», ки аз соли 2009 инҷониб дар доираи таҷлили 1310-солагии зодрӯзи  асосгузори мазҳаби ҳанафӣ Имоми Аъзам дар барномаи таълимии мактабҳои таҳсилоти ҳамагонии кишвар ба роҳ монда шуда буд, ахиран тибқи қарори ҷаласаи ҳайати мушовараи Вазорати маорифи Ҷумҳурии Тоҷикистон аз барномаи таълимӣ ихтисор гардид.         Ноилшо Нуралиев, котиби матбуотии Вазорати маорифи ҷумҳурӣ зимни тавзеҳи ин масъала ба АМИТ «Ховар» иттилоъ дод, ки фанни «Маърифати ислом» ҳафтае як маротиба ба толибилмони  синфҳои 8-и мактабҳои таҳсилоти ҳамагонии кишвар омӯзонида мешуд.