РАИСИИ ГУЛ ШЕРАЛӢ ВА РАҶА ПАРВИЗ

 Душанбе, 7 феврал. (АМИТ  «Ховар», Марзия Саидова). — «Дар ҷаласаи Комиссияи муштараки байниҳукуматии Тоҷикистону Покистон оид ба ҳамкориҳои иқтисодию тиҷоратӣ масъалаҳои гуногуни тавсеаи ҳамкориҳои иқтисодии ҳар ду кишвар баррасӣ мегарданд», — гуфт дар нишасти матбуотӣ ба хабарнигорон сафири фавқулодда ва мухтори Ҷумҳурии Исломии Покистон дар Ҷумҳурии Тоҷикистон Холид Усмон Қайсар. Дипломати покистонӣ афзуд, ки ҷаласаи Комиссияи муштараки иқтисодию тиҷоратӣ аз 9 то 12 феврали соли 2011 дар Душанбе баргузор мегардад. Ҷаласаро аз ҷониби Тоҷикистон Гул Шералӣ- вазири энергетика ва саноати Ҷумҳурии Тоҷикистон ва аз ҷониби Покистон Раҷа Парвиз Ашраф —  вазири об ва энергетикаи Ҷумҳурии Исломии Покистон раисӣ менамоянд.  Интизор меравад, ки дар ҷаласа маҷмӯи масъалаҳои тавсеаи ҳамкориҳои иқтисодию тиҷоратии Тоҷикистону Покистон дар бахши саноат, энергетика, туризм, маориф ва фарҳанг баррасӣ мегарданд.