СИФАТИ ТАХАССУСИИ КАДР- ТАҚОЗОИ ЗАМОН

   Душанбе, 10 феврал. (АМИТ «Ховар», Лаззат Диловарзод).- Дар Паёми Президенти кишвар аз 24 –уми апрели соли 2010 ба Маҷлиси Олии ҶТ таъкид гардидааст, ки сифати тайёр намудани мутахассисони соҳаи тиб дар ҷумҳурӣ беҳбудӣ мехоҳад. Табибон бояд одоби баланди муошират дошта бошанд. Баланд бардоштани сатҳи тарбияи кадрҳо, бозомӯзию такмили ихтисоси онҳо, таҷдиди низоми бозомӯзии баъдидипломии кормандони соҳаи тиб ва дигар тадбирҳои андешидаи роҳбарияти Вазорати тандурустӣ дар ин Паём таъкид гардидааст. Аз ин лиҳоз, баланд бардоштани сатҳи бозомӯзии баъдидипломии кормандони соҳаи тиб тақозо менамояд, ки ба низоми бозомӯзии баъдидипломии кормандони соҳаи тандурустии мамлакат тағйироти ҷиддӣ ворид гардад,- иброз намуд ректори Донишкадаи такмили ихтисоси баъдидипломии кормандони тибби Тоҷикистон, профессор Аламхон Аҳмадов дирӯз дар конфронси солонаи илмӣ – амалии донишкадаи мазкур.  Профессор А. Аҳмадов фаъолияти роҳбарони шӯъба ва бахшҳои тандурустии аксари шаҳру ноҳияҳои ҷумҳурӣ, аз ҷумла ноҳияҳои Роштқалъа, Хоруғ, Ишкошим, Дарвоз ва Мурғоби ВМКБ, Қумсангир, Бохтар, Вахш, Ҷ.Румӣ, Мӯъминобод, Панҷ, Сарбанд, Шӯрообод, Балҷувон, Хуросон, Ҷилликӯл, Темурмалик, Шаҳритӯс, Носири Хисрав, Абдураҳмони Ҷомӣ, Қубодиён, Норак ва Фархори вилояти Хатлон, Истаравшан, Табошар, Қайроққум, Исфара, Панҷакент, Конибодом, Чкалов, Ғончӣ, Ғафуров, Айнӣ, Спитамен, Ашт, Расулов, Кӯҳистони Мастчоҳ ва Мастчоҳи вилояти Суғд, ҳамчунин, ноҳияҳои Тавилдара, Роғун, Варзоб, Тоҷикобод, Файзобод, Ҷиргатол, Нуробод ва Ваҳдати НТҶ- ро дар самти такмили ихтисос ва бозомӯзии кормандони бахши муассисаҳои тандурустии ҷумҳурӣ нокифоя арзёбӣ намуд.   Роҳбарони муассисаҳои тиббии ҷумҳуриявӣ, сардорони раёсатҳои тандурустии вилоятҳо, шӯъбаҳо ва бахшҳои тандурустии шаҳру ноҳияҳои тобеи марказ дар асоси қарори мушовараи Вазорати тандурустӣ «Дар бораи вазъи такмили ихтисоси табибон ва кормандони миёнаи тиббӣ дар муассисаҳои тиббии Вазорати тандурустӣ» вазифадор мегарданд, ки дар муддати як моҳ санҷиши савияи дониши кормандони муассисаҳои зертобеи худро, ки дар ин бора дар ҷаласаи мушовараи вазорат таъкид шуда буд, гузаронида, оид ба гирифтани ихтисоси аввал рӯйхати кормандонашонро ба суроғаи донишкада барои гузаштан аз санҷиши пешазтестӣ тайёр намоянд.   Профессор А. Аҳмадов дар баромади худ ҳамчунин иброз намуд, ки тибқи қарори мушовараи Вазорати тандурустӣ роҳбарони муассисаҳои тиббии сатҳи ҷумҳуриявӣ, сардорони раёсатҳои тандурустии ВМКБ, вилоятҳои Суғду Хатлон, шаҳри Душанбе, шӯъбаҳо ва бахшҳои тандурустии шаҳру ноҳияҳои тобеи марказ вазифадор шуданд, ки ҳангоми ба кор қабул намудани кормандон ихтисоси аввалинашонро ба назар гиранд ва онҳое, ки ихтисоси аввали тиббӣ надоранд, рӯйхаташонро барои аз курсҳои бозомӯзӣ гузаштан ба донишкадаи мзкур, ки наздик ба 200 нафар доктору профессоронро муттаҳид менамояд ва таҷрибаю дониши худро ҳангоми бозомӯзии мутахассисони ихтисоси аввали тиббӣ надошта истифода менамоянд, пешниҳод намоянд.