ТАВАҶҶӮҲИ РУСИЯ БА ОМӮЗИШИ ЗАБОН ДАР ТОҶИКИСТОН

         Душанбе, 2 феврал. (АМИТ «Ховар», Марзия Саидова).- Тавсеаи ҳамкориҳои мутақобилан судманди Тоҷикистон бо Русия зимни мулоқоти Вазири маорифи Тоҷикистон Абдуҷаббор Раҳмонов бо намояндаи махсуси Ҳукумати Русия оид ба равобити давлатҳои ИДМ, роҳбари Агентии Федоролӣ оид ба ҳамкориҳои ИДМ Фарит Мухаметшин дар Душанбе баррасӣ гардид. Дар ин хусус ба АМИТ «Ховар» котиби матбуотии Вазорати маорифи ҷумҳурӣ Ноилшо Нуралиев иттилоъ дод.          Абдуҷаббор Раҳмонов доир ба ҳамкории самарабахши ду кишвар дар бахши илму маориф, хусусан  таҳсили шаҳрвандони тоҷик, омода намудани мутахассисони ботаҷриба дар муассисаҳои таҳсилоти ибтидоӣ, миёна ва олии касбии Русия, таъсиси филиалҳои  муассисаҳои олии касбии Русия дар Тоҷикистон ибрози назар намуда, ба сатҳи хамкориҳои Тоҷикистону Русия дар бахши илму маориф баҳои баланд дод.         Мусоҳибон ҳамзамон роҷеъ ба  масъалаҳои  тавсеа бахшидани омӯзиши забони русӣ дар муассисаҳои таълимии Тоҷикистон ва дар ин раванд ёрии амалӣ расонидани Русия ҷиҳати таъмини муассисаҳои  таълимии Тоҷикистон бо китобу дастурҳои таълимӣ, ҳамкориҳои густурдаи Вазорати маорифи Тоҷикистон  бо Фонди гуманитарии ИДМ ҷиҳати дар Тоҷикистон гузаронидани конфронсҳои минтақавию байналмилалӣ, баргузории чорабиниҳои илмию фарҳангӣ, таҳия ва нашри китобҳои адибон ва фарҳангиёни тоҷик, таҳияи луғату фарҳангҳо табодули назар карданд.