ҶАРОҲАТИ ВАЗНИН АЗ САБАБИ МУНОҚИША

Душанбе, 11 март. (АМИТ «Ховар», Анварбек Сиддиқов).- Муноқишаҳои оилавӣ  оқибат ба  нохушиҳои ҳаёт оварда мерасонанд. Тавре аз маркази матбуоти ВКД-и ҷумҳурӣ ба хабарнигори  АМИТ «Ховар» иттилоъ доданд, 10 марти соли ҷорӣ истиқоматкунандаи ҷамоати деҳоти Чоркӯҳи ноҳияи Исфараи вилояти Суғд Бурҳон Исломов, соли таваллудаш 1955, тахминан соати 21:00 дар ҳавлии истиқоматиаш бо ҳамсараш Саёҳат Исломова муноқиша менамояд.  Зимни муноқиша номбурда бо корди хоҷагӣ як маротиба ба қафаси синаи ҳамсари худ мезанад.  Дар натиҷа С. Исломова ҷароҳати вазнини ҷисмонӣ  бардошта ба беморхонаи марказии ноҳия бурда мешавад.        Кормандони  мақомоти дахлдори ноҳияи Исфара Бурҳон Исломовро боздошт намуда, оид ба амали содирнамудаи ӯ чора мебинанд.