АРҶГУЗОРӢ БА ЗАН-МОДАР ДАР ВАЗОРАТИ МОЛИЯ

   Душанбе, 7 март. (АМИТ «Ховар», Покиза Маҳмадбекова).  — Имрӯз дар Вазорати молияи Ҷумҳурии Тоҷикистон бахшида ба Иди модарон-8-уми март ҷамъомади пуршукӯҳ доир гардид.   Вазири молия Сафаралӣ Наҷмиддинов зимни баромади хеш дар мавриди нақши зан-модар дар ҷамъият ва оила сухан гуфта ба ҳозирин сиҳатмандии комил, хушбахтӣ ва хонаободӣ, ҳамчунин, барору комёбиҳоро дар фаъолияти ҳамарӯза ва корҳои минбаъдаашон таманно намуд.    Дар хотимаи ҷамъомад вазири молия ба директори маркази ҳифзи чизҳои қиматбаҳои назди Вазорати молияи ҷумҳурӣ З. Давлатова Ифтихорномаи Кумитаи  кор бо занон ва оилаи назди Ҳукумати ҶТ-ро  супорид.    Тибқи фармони Президенти кишвар аз 6 марти соли 2009-ум дар Тоҷикистон ҳамасола 8-уми март чун рӯзи Модар ҷашн гирифта мешавад.             Дар фармон омадааст, ки табдили ном намудани ин ҷашн «бо мақсади арҷ гузоштан ба зан-модар, бахшандаи ҳаёт, тарбиятгари наслҳо, ҳидоятгари ҷавонон ба роҳи рост ва такягоҳи оила» сурат гирифтааст.