БАРРАСИИ МАСОИЛИ ҲИФЗИ САЛОМАТИИ МУҲОҶИРОНИ МЕҲНАТӢ

Душанбе, 9 март. (АМИТ «Ховар», Анварбек Сиддиқов). — Дар шаҳри Маскави ФР 2-3 марти соли ҷорӣ ҷаласаи гурӯҳи кории «Ҳамкорӣ дар соҳаи ёрии тиббӣ ба муҳоҷирони меҳнатӣ» баргузор гардид, ки дар он протоколи ҷаласаи Комиссияи намояндаи доимии Иттиҳоди иқтисодии ЕврАзия аз 25 январи соли 2011 муҳокима гардид. Дар он намояндагони мақомоти муҳоҷират ва тандурустии  кишварҳои аъзои Иттиҳоди иқтисодии ЕврАзия иштирок карданд. Ҷумҳурии Тоҷикистонро дар ин ҷаласа сардори шӯъбаи таъминоти ҳуқуқӣ ва муносибатҳои байналхалқии Хадамоти муҳоҷирати назди Ҳукумати ҶТ Зумрад Солиева ва сардори Раёсати ташкили хизматҳои тиббии Вазорати тандурустии ҶТ Октам Бобохоҷаев муаррифӣ намуданд. Коршиносон дар ҷаласа лоиҳаи Созишнома дар бораи эътирофи дуҷонибаи хулосаи тиббии вазъи саломатии муҳоҷирони меҳнатии кишварҳои аъзои Иттиҳоди давлатҳои ЕврАзияро, ки бо назардошти фикру ақидаҳои коршиносон омода шудааст, ҷонибдорӣ намуданд.         Инчунин, пешниҳод гардид, ки Вазорати тандурустӣ ва рушди иҷтимоии ФР дар якҷоягӣ бо Вазорати рушди иқтисоди ин кишвар   лоиҳаи Созишномаи мазкурро омӯхта, пешниҳод ва хулосаи худро то 1 апрели соли ҷорӣ якҷоя бо хулосаи баррасии масъалаи мазкур дар ҷаласаи даҳуми Шӯрои тандурустӣ ба котиботи Кумитаи ҳамгироии Иттиҳоди иқтисодии ЕврАзия пешниҳод намоянд.