РОҲҲО БУНЁД МЕГАРДАНД

Хоруғ,  9 март. (АМИТ «Ховар», Л.Додо). – Дар  ВМКБ  роҳи  нақлиёти  автомобилӣ  ягона  василаи  кафолати  равобити  мардуми  Бадахшон  бо  манотиқи  гуногуну  марказ ва   боркашонӣ  маҳсуб  меёбад. Барои  бунёду васеъ  намудани  ин  роҳҳо  Ҳукумати  ҷумҳурӣ  корҳои  азимро  сомон  дод. Бино ба  гуфти  раиси   кумитаи  иқтисодии  мақомоти  иҷроияи  маҳаллии  ҳокимияти  давлатии  вилоят Латиф  Шоҳзодаев марҳилаи  дуввуми   роҳи  автомобилгарди Шоҳон – Зиғар, ки  масофааш  9,75 км  буд, ба анҷом расид. Дар сохтмони роҳи мазкур 15,9  млн. доллар  маблағ сарф гардид. Барои бунёди  марҳилаи  сеюми   роҳи  мазкур, ки   дарозиаш  18,75 км  мебошад,  ба  маблағи 20 млн. 290 ҳазор  доллар  корҳо  оғоз  гардидаанд.       Инчунин,   лоиҳаи   бунёди  роҳи  Кӯлоб —  Қалъаи  Хумб   дар  масофаи  90,2 км  дастгирӣ  ёфта, ба  хотири  сохтмони  марҳилаи  аввал, ки   40  км   роҳро дар бар мегирад,  бо  сарфи    92,9 млн. доллар  байни  Ҳукумати ҷумҳурӣ,   Бонки  Рушди Осиё,  Бунёди  рушди  иқтисоди  Араб,  Бунёди  рушди  Саудӣ  созишнома  ба  имзо   расида  озмун  эълон  гардид. Инчунин,  лоиҳаҳои  инвеститсионии таҷдиди   роҳи  автомобилгарди  Қалъаи  Хумб – Хоруғ – Мурғоб – ағбаи  Кулма  ба  маблағи 299,6  млн.  доллар, дар  минтақаи  Ишкошим барқарорсозии  роҳи  автомобилгарди  Хоруғ – Мурғоб – ағбаи Кулма   ба  маблағи  243,5  млн.  доллар  таҳия  шудаву ба баррасии  сармоягузорон  пешниҳод  шудаанд.