ТАЪМИНИ 150 НАФАР БО ҶОЙИ КОР

Суғд, 9 март. (АМИТ «Ховар», Самад Юсуфӣ). — Дар ноҳияи Бобоҷон Ғафуров ҷашни 20–солагии Истиқлолияти Ҷумҳурии Тоҷикистонро бо ободкориву созандагӣ истиқбол мегиранд. Бахшида ба  ин санаи муҳим дар ҷамоати Ҳайдар Усмон, ки дар ноҳия   калонтарин  ҷамоат аст, як қатор марказҳои хизматию маишӣ сохта ба истифода дода мешаванд. Тавре раиси ҷамоати мазкур Бахтиёр Ашӯрматов иттилоъ дод, айни замон сохтмони мағозаи маҳсулоти хӯрокворӣ, нуқтаи таъмири яхдон ва мағозаи қисмҳои эьтиётӣ барои яхдон, нуқтаи таъминоти сӯзишвории нақлиёт, ҳаммом, маркази савдо бо дастгирии соҳибкорон идома дорад. Дар назар аст, ки баробари бунёди ин иншоот дар маҷмӯъ 150 нафар аҳолии маҳаллӣ бо ҷойи кор таъмин мегарданд.