ТАЪСИСИ ШӮРОИ НАВ ДАР НАЗДИ ҲУКУМАТИ ҶУМҲУРИИ ТОҶИКИСТОН

   Душанбе,  1 март. (АМИТ «Ховар», Дилшодаи Хайруллоҳ). — Дирӯз дар ҷаласаи Ҳукумати Ҷумҳурии Тоҷикистон  бо қарори дахлдори Ҳукумати мамлакат Шӯрои рушди тарбияи ҷисмонӣ ва варзиш дар назди Ҳукумати Ҷумҳурии Тоҷикистон таъсис дода шуда, Низомнома ва ҳайати Шӯро тасдиқ гардид.    Раиси Шӯро ба дӯши Сарвазири Ҷумҳурии Тоҷикистон вогузор гардида, муовини Сарвазири  Ҷумҳурии Тоҷикистон сарпарасти соҳа ва Раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон  муовинони ӯ таъин шуданд.    Ҳамзамон ба аъзогии Шӯро роҳбарони вазорату идораҳои дахлдори ҳукумат, Раисони ВМКБ, Суғд, Хатлон ва шаҳри Душанбе, ректори Донишкадаи тарбияи ҷисмонӣ ва варзиш, раисони федератсияи дзюдо,  раиси Кумитаи марказии Ташкилоти мададгори мудофиа, раиси Ассотсиатсияи рӯзноманигорони бахши варзиш ва олимпичиёни Тоҷикистон, директории идоракунандаи КВД «Ширкати алюминийи Тоҷик», сардори КВД «Роҳи оҳани Тоҷикистон», раиси Раёсати Бонки амонатгузорӣ «Амонатбонк», раисони ҷамъиятҳои саҳомии кушодаи  «Агроинвестбонк», «Ориёнбонк» ва варзишгарони машҳури мамлакат Расул Боқиев ва Дилшод Назаров шомиланд.    Мақсади асосии Шӯро ин мусоидат дар рушд ва татбиқи сиёсати давлатӣ дар соҳаи тарбияи ҷисмонӣ ва варзиш ва ҳамоҳангсозии фаъолияти мақомоти давлатӣ дар ин самт мебошад.             Дар ин бора ба хабарнигори АМИТ «Ховар» аз бахши итилоотию таҳлилии Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон хабар доданд.