ҲИММАТБАЛАНДИИ ШАҲРДОРӢ

Душанбе, 7 апрел. (АМИТ «Ховар», Марзия Саидова). — Раиси шаҳри Душанбе Маҳмадсаид Убайдуллоев имрӯз бо  228 нафар собиқ сокинони кӯчаи Таҳмос, ки манзилҳояшон барои эҳтиёҷоти давлатӣ -сохтмони «Наврӯзгоҳ»-и Душанбе гирифта шуд, вохӯрӣ намуд. Маҳмадсаид Убайдуллоев бори дигар сипосмандии роҳбарияти шаҳрро  ба собиқ сокинони кӯчаи Таҳмос иброз намуда, ба онҳо ба маблағи 3 ҳазор сомонӣ кӯмаки молиявии якдафъина  расонид.  Тибқи иттилои котиби матбуотии Раиси шаҳр Шавкат Саидов,  тадбири мазкур дар доираи татбиқи Қарори Маҷлиси вакилони халқи шаҳри Душанбе аз 25 марти соли 2011 сурат гирифта, дар маҷмӯъ аз ҳисоби фонди захиравии Раиси шаҳри Душанбе қариб 700 ҳазор сомонӣ сарф шуд. Раиси шаҳр аз собиқ сокинони кӯчаи Таҳмос ҳамзамон даъват ба амал овард, ки дар нигоҳубин ва истифодаи квартираҳои хусусӣ бо таъсиси ширкатҳои соҳибмулкони манзил ва риояи одоби баланди шаҳрдорӣ тавассути иштирок дар маъракаҳои ободонии маҳал ва шаҳр нақши муассир гузоранд.