МАНЪИ САЙДИ МОҲӢ ДАР ОБАНБОРҲОИ СУҒД

Душанбе, 6 апрел. (АМИТ «Ховар», Бекназари Абӯбакр). — Бо қарори махсуси раиси вилояти Суғд аз 4 апрели соли 2011 сайди моҳӣ дар обанборҳои қаламрави вилоят манъ гардид. Аз хадамоти матбуоти раиси вилоят ба АМИТ «Ховар» иттилоъ доданд, ки ин тадбир баҳри муҳофизат ва нигаҳдории захираҳои моҳии обанборҳои вилоят, муборизаи самарабахш бар зидди моҳидорӣ дар давраи тухмгузории моҳӣ аз санаи 5 апрел то 20 июни соли равон дар амал татбиқ  мешавад. Ҳайати ситоди вилоятӣ ҷиҳати амалӣ намудани чорабиниҳои ҳифзи моҳӣ дар давраи тухмгузории соли 2011 тасдиқ   шуд. Раёсати ҳифзи муҳити зисти вилоят, Идораи шабакаҳои барқии вилоят ва Раёсати мелиоратсия ва захираҳои оби вилоят  вазифадор  шуданд, ки ҷиҳати риояи коркарди сатҳи оби обанбори Қайроққум ва Сирдарё дар давраи тухмгузории моҳӣ назорати давлатӣ баранд.