РАҚОБАТПАЗИРИИ ТАШКИЛОТҲОИ СОХТМОНӢ ДАР ОЗМУНҲОИ БАЙНАЛМИЛАЛӢ

Душанбе, 19 апрел. (АМИТ «Ховар»,  Мавзуна Бойева). – Кормандони Агентии сохтмон ва меъмории назди Ҳукумати ҶТ ҷиҳати иҷрои Қарори Ҳукумати ҶТ «Дар бораи тасдиқ намудани барномаи «Беҳбудии фазои соҳибкорӣ-200 рӯзи ислоҳот» корҳои муайян ва мушаххасро ба анҷом расониданд. Дар ин асос лоиҳаи Барномаи дастгирии ташкилотҳои сохтмонӣ оид ба беҳтар намудани фазои сармоягузорӣ ва соҳибкорӣ дар соҳаи сохтмон барои солҳои 2011-2012 таҳия гардид. Дар ин бора директори Агентии сохтмон ва меъмории назди Ҳукумати ҶТ Абдувалӣ Комилов зимни нишасти матбуотӣ ба хабарнигорони ватанию хориҷӣ иттилоъ дод.  Ӯ ҳамчунин зикр намуд, ки   лоиҳаи  қарори Ҳукумати ҶТ ва нақша-чорабиниҳо таҳия гардида, ба котиботи Шӯрои машваратӣ пешниҳод гардид.             Мақсади асосӣ аз таҳия намудани Барномаи мазкур  ва нақшаи чорабиниҳо ин мусоидат намудан ба баланд бардоштани рақобатпазирии ташкилотҳои сохтмонӣ дар озмунҳои байналмилалӣ ва мустаҳкам кардани заминаҳои моддӣ-техникии онҳо мебошад, гуфт дар хотима А.Комилов.