Ду фирории дигарро безарар гардониданд

Душанбе, 26 июл. (АМИТ «Ховар», Анварбек Сиддиқов).- Дар идомаи амалиёти махсуси дастгиркунии маҳбусоне, ки шаби 22 ба 23-августи соли 2010-ум аз маҳкамаи тафтишотии Кумитаи давлатии амнияти миллии Ҷумҳурии Тоҷикистон фирор намуда буданд, рӯзи 25-уми июли соли равон ҳангоми гузаронидани амалиёти фаврӣ-ҷустуҷӯӣ аз ҷониби кормандони мақомоти корҳои дохилӣ ва Кумитаи давлатии амнияти миллии Ҷумҳурии Тоҷикистон дар якҷоягӣ бо дигар воҳидҳои махсуси сохторҳои қудратии кишвар дар деҳаи Чилдараи ҷамоати деҳоти Ҳафтчароғи ноҳияи Тавилдара дар минтақаи мушкилгузари кӯҳӣ мавқеи пинҳоншавии боз ду тан аз фирориён ошкор карда шуд. Тавре аз ВКД-и кишвар ба АМИТ «Ховар» хабар доданд, ҳангоми дастгир намудани ҷинояткорон онҳо муқобилияти сахти мусаллаҳона нишон дода, дар натиҷа истиқоматкунандаи деҳаи Туғули ноҳияи Панҷ Зиёев Ҷонибек Абдусамадович (соли таввалудаш 1979) дастгир шуда, истиқоматкунандаи деҳаи Чашмасори ноҳияи Тавилдара Ҳасанов Баҳриддин Қаюмович (соли таввалудаш 1968), ки дар рафти муқовимати мусаллаҳона захмӣ гардида буд, фавтид.Аз ҷои ҳодиса ду автомати Калашников, як таппонча ва дигар лавозимоти ҷангӣ дарёфт ва мусодира карда шуд. Мутаассифона, дар ин задухӯрди мусаллаҳона як корманди воҳиди таъиноти махсуси ШКД-и ноҳияи Тавилдара ҷароҳати вазнини ҷисмонӣ бардошта, ба ҳалокат расид. Дар рафти амалиёти мазкур ду нафар аз кормандони дигари воҳиди таъиноти махсуси Раёсати корҳои дохилии ноҳия ва минтақаи Рашт захмӣ гаштанд.Ёдовар мешавем, ки аз ҷумлаи 25 нафар маҳбусони фирорӣ то имрӯз 24 нафарашон дастгир ва безарар гардонида шуда, амалиёт ҷиҳати дастгир намудани охирин маҳбуси фирорӣ идома дорад.