Маҳсулоти саноат меафзояд

Душанбе, 26 июл. (АМИТ «Ховар», Покиза Маҳмадбекова). – Тавре директори Агентии омори назди Президенти ҶТ Бахтия Муҳаммадиева дар ҷараёни ҳисоботаш дар нишасти матбуотӣ изҳор намуд, «дар нимаи аввали соли 2011 дар ҷумҳурӣ ба маблағи беш аз 3 миллиард сомонӣ маҳсулоти саноат истеҳсол гардид». Мувофиқи суханони номбурда дар давраи ҳисобот ҳаҷми маҳсулоти умумии кишоварзӣ нисбат ба хамин давраи соли 2010 баробари 8,6 фоиз афзуд. Тайи шаш моҳи соли равон истихроҷи ангишт, газ, маводи ғайримаъданӣ, истеҳсоли тахтасанг, трансформатор ва навъҳои гуногуни сим зиёд гардид. «Ҳамзамон тавлиди нерӯи барқ, истихроҷи ангишти бӯр, намак, макарон, машрубот, ҳамчунин газвори пахтагин ва собуни ҷомашӯӣ коҳиш ёфт», — афзуд Б.Муҳаммадиева.Номбурда илова намуд, ки дар давраи гузашта ҳаҷми маҳсулоти соҳаи чорводорӣ беш аз 1,2 миллиард сомониро ташкил дод. Дар ин давра дар ҳамаи хоҷагиҳои кишвар қариб 362, 5 ҳазор тонна ғалла, 152,1 ҳазор тонна картошка, 223,5 ҳазор тонна сабзавот ва 37,2 ҳазор тонна мева ба даст омадааст, ки назар ба ҳамин давраи соли гузашта зиёд аст.