Бунёди ду нерӯгоҳи хурди нав дар Тоҷикистон

Душанбе, 26 август. (АМИТ «Ховар», Кристина Эрлих). – Дар Тоҷикистон ду нерӯгоҳи хурди нав бунёд гардид. Дар ин бора ба хабарнигори АМИТ «Ховар» аз Вазорати энергетика ва саноати Ҷумҳурии Тоҷикистон хабар доданд. Тибқи суханони манбаъ, иқтидори нерӯгоҳҳои хурди мазкур 30 ва 10 кВт/с буда, дар ноҳияҳои Ваҳдат ва Балҷувон сохта шудаанд. «Ба ҳамин васила аз оғози соли равон дар кишвар 28 нерӯгоҳи хурд ва як нерӯгоҳи бодӣ сохта шуд», — зикр намуд манбаъ. Аз аввали соли ҷорӣ тавлиди умумии нерӯи барқи нерӯгоҳҳои хурд зиёда аз 7 миллион кВт/с-ро ташкил дод.Аз Вазорати энергетика ва саноати ҶТ ҳамчунин иттилоъ доданд, ки айни замон корҳо барои бунёди 26 нерӯгоҳи хурд идома доранд ва онҳо охири соли ҷорӣ мавриди истифода қарор мегиранд.