Дастовардҳои Истиқлоли Тоҷикистон дар Деҳлӣ матраҳ шуд

Душанбе, 29 август.(АМИТ «Ховар», Марзия Саидова).- «Рушди Тоҷикистон баъди ба даст овардани Истиқлолият»- таҳти чунин унвон ба ифтихори 20-умин солгарди Истиқлолияти давлатии Ҷумҳурии Тоҷикистон дар Деҳлии ҷадид пойтахти Ҳиндустон семинар баргузор гардид. Чорабинии мазкур бо ибтикори Сафорати Ҷумҳурии Тоҷикистон дар Ҷумҳурии Ҳиндустон дар ҳамкорӣ бо маркази илмию фарҳангии Сафорати Русия дар Ҳиндустон созмон дода шуда, дар он 150 нафар меҳмонон ва намояндагони корпусҳои дипломатии муқими Ҳиндустон иштирок доштанд.Иштирокдорони семинар зимни маърӯзаҳои пурмӯҳтаво доир ба дастовардҳои бузурги сиёсию иқтисодӣ ва иҷтимоию фарҳангии Тоҷикистон баъд аз ба даст овардани Истиқлолияти давлатӣ ибрози назар намуда, Истиқлолияти давлатии Ҷумҳурии Тоҷикистонро неъмати бузург барои миллати тоҷик арзёбӣ карданд. Зикр шуд, ки Ҷумҳурии Тоҷикистон баъди ба даст овардани Истиқлолияти давлатӣ ба дастовардҳои бузурги иқтисодию иҷтимоӣ, илмию фарҳангӣ ва варзишӣ мушарраф гардид. Тоҷикистон дар зарфи 20 соли Истиқлолият ҳамчун давлати мустақил дар миқёси ҷомеаи ҷаҳон обрӯю эътибор ва нуфузи хосса касб карда, ҳамкориҳои мутақобилан судманд ва гуногунсоҳаи Тоҷикистон бо кишварҳои ҷаҳон ва созмонҳои мӯътабари байналмилалӣ беш аз пеш густариш меёбанд.Ҳамзамон, дар ҷараёни семинар филми ҳуҷҷатӣ ва расму аксҳо доир ба таърих, ҳаёти иқтисодию иҷтимоӣ ва илмию фарҳангии Тоҷикистон намоиш дода шуд. Аз сафорати Тоҷикистон дар Деҳлӣ ба АМИТ «Ховар» иттилоъ доданд, ки дар семинар доираҳои сиёсӣ, иқтисодӣ ва илмию фарҳангии Ҳиндустон иштирок доштанд.