Фонди Китобхонаи миллӣ ғанитар гардид

Душанбе, 10 август. (АМИТ «Ховар» Мавзуна Бойева)- Барои дастгирии сиёсати фарҳангии кишвар ва ғанӣ гардонидани хазинаи Китобхонаи миллӣ кормандони Фурудгоҳи байналмилалии Душанбе якдилона китоб ҷамъоварӣ намуданд. Дар рўйхати номгўйи китобҳои ҷамъоваришуда номҳои классикони адабиёти тоҷику форс-Фирдавсӣ, Ҷомӣ, Хайём, Низомӣ, нависандагони маъруф Ҷалол Икромӣ, Шодон Ҳаниф, Сотим Улуғзода, Мирсаид Миршакар, Мирзо Турсунзода, нависандагони рус Лев Толстой, Некрасов, Сергей Есенин, инчунин осори нависандагони англису амрикоӣ, фаронсавӣ, арабу осетинро дидан мумкин буд. Маъракаи ҷамъоварии китоб маълум кард, ки новобаста аз он ки васоити гирифтани иттилоъ тариқи расонаҳои электронӣ, радио, телевизион, интернет дастрас аст, боз ҳам беҳтарин ва дўстдоштатарин машғулият барои одамон китобхонӣ буд ва боқӣ хоҳад монд. Ҳамин тариқ, дар маҷмўъ 5469 номгўй китоб ҷамъоварӣ шуда, ба Китобхонаи ба номи Абулқосим Фирдавсӣ супорида шуд.Дар ин бора ба АМИТ «Ховар» аз маркази матбуоти Фурудгоҳи байналмилалии Душанбе хабар доданд.