Героин дар камераи резинии велосипед

Душанбе, 24 август. (АМИТ «Ховар», Лутфия Эшонқулова).- 23 августи соли равон ҳангоми гузаронидани корҳои фаврӣ — ҷустуҷӯӣ аз тарафи кормандони Раёсати ташкили мубориза бар зидди ҳуқуқвайронунии гумрукии Хадамоти гумруки назди Ҳукумати Ҷумҳурии Тоҷикистон дар шоҳроҳи Душанбе-Қурғонтеппа, мошинаи сабукрави тамғаи «Мерседес Бенс», ки ба шаҳрванд «Н» тааллуқ дошт, боздошт гардид.Ҳангоми тафтиш аз бордони автомашинаи мазкур аз дохили ҷузвдони шаҳрванди Ҷумҳурии Тоҷикистон Саъдулло Шамсов ду бастаи резинии камераҳои велосипед, ки дар дохилашон хокаи монанд ба маводи нашъаовари навъи «героин» ҷойгир шуда буд, дарёфт карда шуд.Инчунин кормандони Раёсати номбурда шаҳрванд Олиямо Муродова, соли таваллудаш 1965-ро бо ҷурми даст доштан ба нашъаҷаллобӣ бо маводи мухаддир боздошт намуданд. Ташхиси лабораторӣ нишон дод, ки маводи боздоштшуда навъи «героин» буда, вазни холиси он аз С. Шамсов 3 кг 552,1 грамм ва аз О. Муродова 7 кг 296,2 граммро ташкил дод. Нисбат ба шаҳрвандони номбаршуда парвандаҳои ҷиноятӣ оғоз гардида, ба Прокуратураи ноҳияи Фирдавсӣ ва ба Раёсати корҳои дохилии шаҳри Душанбе ирсол карда шуд.Дар ин бора ба АМИТ «Ховар» аз маркази матбуоти Хадамоти гумруки назди Ҳукумати ҶТ хабар доданд.